Abatuye mu turere dutandukanye tw’Intara y’Iburasirazuba bavuga ko ikibazo cy’inda ziterwa abangavu kigikomeje kubahangayikisha, bakagaragaza ko nubwo hari ingamba zashyizweho zo kugikumira, hakiri imbogamizi zirimo uburangare bwa bamwe mu babyeyi, ubukene ndetse n’abashuka abana bakabizeza imibereho myiza.

Abaturage bavuga ko usibye uburangare bw’ababyeyi, ubukene, amakimbirane yo mu ngo, kutaganiriza abana ku buzima bw’imyororokere, guta ishuri n’abagabo bashuka abangavu babizeza amafaranga cyangwa impano, na byo biri mu mpamvu zikomeje gutuma inda ziterwa abangavu ziyongera.

Abangavu bahuye n’iki kibazo bavuga ko bahura n’ingaruka zirimo guhagarika amashuri, guhezwa n’imiryango, kubura ubushobozi bwo kurera abana babyaye no gusigara bonyine nyuma y’uko ababateye inda babihakanye cyangwa babatorotse.

Nubwo hari abagabo bagezwa imbere y’ubutabera bakekwaho gusambanya abana, abaturage bagaragaza ko hari imanza zitagera mu nkiko bitewe n’uko bamwe mu miryango bahitamo ubwumvikane butemewe n’amategeko cyangwa ntibatange amakuru ku bakoze ibyo byaha.

Umuyobozi wungirije w’Akarere ka Gatsibo ushinzwe imibereho myiza y’abaturage, Mukamana Marceline, yabwiye UKWELITIMES ko gutanga amakuru ku gihe ari imwe mu ntwaro zikomeye zo guhangana n’iki kibazo. Yasobanuye ko ubuyobozi bukomeje gukora ubukangurambaga mu mashuri no mu baturage, bugamije gushishikariza ababyeyi n’urubyiruko kugira uruhare mu gukumira inda ziterwa abangavu.

Yongeyeho ko umwana wese utarageza ku myaka 18 aba agomba kurindwa n’ababyeyi ndetse n’umuryango muri rusange, ashimangira ko guhishira abakora ibyaha byo gusambanya abana bidindiza ubutabera kandi bigatiza umurindi ikibazo.

Imibare y’igihugu igaragaza ko ikibazo kigihangayikishije. Mu mwaka wa 2024 habaruwe abangavu 8,801 bafite hagati y’imyaka 14 na 19 batewe inda. Ubushakashatsi bwa karindwi ku mibereho n’ubuzima mu Rwanda (DHS 2025) na bwo bwerekanye ko igipimo cy’abangavu bafite hagati y’imyaka 15 na 19 batewe inda cyazamutse kigera kuri 8%, kivuye kuri 5% cyariho mu 2020, mu gihe uturere two mu Ntara y’Iburasirazuba turimo Gatsibo, Kayonza, Ngoma, Rwamagana na Nyagatare dukomeje kuza mu twugarijwe cyane n’iki kibazo.